当前位置: 首页 > 资讯 >

SmarTone 5G 有望本月开通地铁三主线,带你先睇地铁「准 5G」速度!

SmarTone 上个月终於正式公布推出 5G 计划,虽然迟咗些少,不过 SmarTone 反而有唔少「杀着」令到佢地获得更多人关注。今日 SmarTone 就喺观塘 APM 以及中环 IFC 举行 RoadShow 以展示 5G 应用体验,期间我地都八到大家关心嘅其中一个问题:咁地铁线几时有 5G 啊?

先了解一下 SmarTone 嘅 5G,相信大家都知佢地系全港唯一一间采用爱立信设备建设 5G 嘅一间网络商。而用 Ericsson 嘅好处,就系可以发挥佢地独有嘅 DSS (Dynamic Specturm Sharing) 技术。而 DSS 强项在於灵活弹性地给 4G 及 5G 共用频谱,可以喺 4G/5G 之间嘅信号切换做到 1 微秒。运用现时已有嘅 4G 网络轻松提升至 5G,从而加快全港 5G 嘅覆盖率。

Ericsson 5G DSS 技术图解

今日 SmarTone 喺观塘 APM 以及中环 IFC 举行 RoadShow,期间我地都访问过 SmarTone 工程部总管梁忠兴先生,问及地铁几时支援 5G 呢个好多人都想知嘅问题。梁先生表示,SmarTone 现时 5G 舖设利用 Ericsson 嘅 DSS 技术优势,透过现时 4G 嘅 LTE 2100 (N1) 频谱提供 5G 覆盖,因此可以好快地喺全港各区开启 5G 服务。

SmarTone 工程部总管梁忠兴先生

咁地铁呢?相信大家都知现时地铁各线 SmarTone 嘅覆盖及速度都做得唔错,而梁先生表示已经加紧同地铁公司合作,最快有望今个月内透过 LTE 2100 (N1) 频谱,先喺最主要嘅三条线,即荃湾线、观塘线、柴湾线,提供 5G 覆盖服务。

5G,大家可能听得最多嘅系用中频 3.3/3.5GHz、4.9GHz 或高频 26/28GHz,好处就系速度快以及超级快,但坏处就系越高频射程越短。而用 LTE 2100 嘅频谱去升级做 5G,速度来讲对比起 3.5GHz 当然有所不及,但好处就系覆盖率高好多,而且亦都有 5G 嘅低时延特性,例如平均做到 10 – 12 ms,呢个好处已经比起 4G 嘅 2x 至 4x ms 好得多。再加上,5G 可以让同时更多装置连接。据梁先生讲,地铁 5G 开通初期虽然 4G 及 5G 共用 2100 频谱,但资源唔会偏向其中一边。因为随住 5G 手机越来越多,表示用 4G 嘅就自然地会相对减少,所以唔会出现「争频」嘅情况。

所以,透过现时地铁各线嘅 SmarTone 4G 速度,可以大概了解到今年 5G 初期喺地铁推出时嘅速度,我地就叫佢做「准5G」啦。当然,随住日後 5G 网络再升级,来年嘅 SA 5G 网络,速度必定会比起现时高好多。

以下「准5G」大家可以「先作个参考」,强调返:以下系用 SmarTone 嘅 5G SIM 卡行 4G 网络作测试,速度跟 5G 必有落差,地铁 5G 要等开通先有 (最快今个月内),届时再为大家测试:

▲ 中环 (大堂),下载 263Mbps

▲ 尖沙咀 (月台),下载 277Mbps

除咗大堂及月台,我地早前都有测试过 SmarTone 喺地铁车厢行驶紧速度,大家按呢度睇返作为参考。换言之,现时 SmarTone 喺地铁主要三条线嘅 4G 速度已经十分理想,由此可见同样系采用 2100MHz 频谱去做 5G 嘅话,相信速度都可以保持到 4G 以上嘅质素,到日後再升级後预计会更加快。

发表评论